KAMATI YA KUDUMU YA HUDUMA ZA JAMII YATOA WITO KWA WATANZANIA KUSHIRIKI KIKAMILIFU DHIDI YA VITENDO VYA UKATILI | Tarimo Blog

KAMATI ya Kudumu ya Bunge ya Huduma na Maendeleo ya Jamii imeitaka jamii ya kitanzania kushiriki kikamilifu katika mapambano dhidi ya vitendo vya ukatili wa kijinsia katika maeneo yao.
 
Hayo yamebainika leo jijini Dodoma katika kikao kilichokutanisha Kamati ya Kudumu ya Bunge ya Huduma na Maendeleo ya Jamii, Wizara ya Afya- Idara Kuu ya Maendeleo ya Jamii na Shirika la UNFPA kilicholenga kujadili jinsi ya kukomesha vitendo vya ukatili wa kijinsia katika jamii.
 
Akizungumza katika kikao hicho, Mwenyekiti wa Kamati hiyo Stanslaus Nyongo amesema vitendo vya ukatili wa kijinsia vinatokea katika jamii na hivyo Jamii inawajibu wa kukomesha vitendo hivyo.
 
Ameongeza kuwa elimu inahitajika kwa kiasi kikubwa kwa jamii katika kuhakikisha inabadili mitazamo ambayo kwa kiasi kikubwa inasababisha vitendo vya ukatili wa kijinsia katika familia na jamii
 
“Tukifanikiwa kubadili mitazamo ya jamii zetu katika baadhi ya mambo hasi itasaidia sana kupungua kwa vitendo vya ukatili wa kijinsia katika jamii zetu” Amesema Nyongo.
 
Kwa upande wake Naibu Waziri wa Afya, Maendeleo ya Jamii, Jinsia, Wazee na Watoto, Dk Godwin Mollel amesema kuwa Serikali inashirikiana na wadau mbalimbali likiwemo shirika la UNFPA katika kuhakikisha inawafikia jamii hasa za vijijini katika kuwapatia elimu katika midahalo na mikusanyiko  mbalimbali kuhusu madhara ya vitendo vya ukatili kwa ustawi wa jamii
 
Naibu Waziri Dk Mollel ameongeza kuwa vitendo vya ukatili wa kijinsia katika jamii zetu vinatokana malezi na makuzi ndani ya Jamii.

Mwenyekiti wa Kamati ya Kudumu ya Bunge ya Huduma na Maendeleo ya Jamii, Stansalus Nyongo akizungumza katika kikao kilichowakutanisha Kamati hiyo na Wizara ya Afya-Idara ya Maendeleo ya Jamii kuwapitisha katika mikakati ya Serikali ya kupambana na vitendo vya ukatili wa kijinsia kilichofanyika jijini Dodoma.

Naibu Waziri wa Afya, Maendeleo ya Jamii, Jinsia, Wazee na Watoto, Dk Godwin Mollel akifafanua jambo kwa Kamati ya Kudumu ya Bunge ya Huduma na Maendeleo ya Jamii katika kikao kilichowakutanisha na Wizara kupitisha katika mikakati ya Serikali ya kupambana na vitendo vya ukatili wa kijinsia kilichofanyika jijini Dodoma.

Mkurugenzi wa Sera na Mipango kutoka Wizara ya Afya-Idara ya Maendeleo ya Jamii, Sayi Magessa akielezea lengo la kikao kilichowakutanisha Kamati ya Kudumu ya Bunge ya Huduma na Maendeleo ya Jamii na Wizara akieleza utekelezaji wa mikakati ya Serikali ya kupambana na vitendo vya ukatili wa kijinsia kilichofanyika jijini Dodoma.
 
Mafunzo ya Ufugaji Bora na Matibabu, Jiunge sasa kwa KUBOFYA HAPA