WATUMISHI WIZARA YA MAMBO YA NJE NA USHIRIKIANO WA AFRIKA MASHARIKI WAPATA FURSA KUJIFUNZA KIFARANSA | Tarimo Blog

Mkurugenzi wa Idara ya Diaspora katika Wizara ya Mambo ya Nje na Ushirikiano wa Afrika Mashariki Balozi Anisa Mbega(wa nane kulia) na Ubalozi wa Ufaransa nchini Tanzania Frederic Clavier (wa saba kulia) wakiwa katika picha ya pamoja na baadhi ya watumishi wa Wizara hiyo ambao wamepta kozi za muda mfupi za lugha ya Kifaransa na leo wamekabidhiwa vyeti vya kuhitimu.

Mkurugenzi wa Idara ya Diaspora katika Wizara ya Mambo ya Nje na Ushirikiano wa Afrika Mashariki Balozi Anisa Mbega akizungumza wakati wa tukio la baadhi ya watumishi wa Wizara hiyo wakitunukiwa vyeti vyao baada ya kuhitimu lugha ya Kifaransa waliyoipata kwenye kituo cha Utamaduni cha Ufaransa.Watumishi hao wamepata kozi fupo za kujifunza lugha hiyo kwa hatua ya kwanza na hatua ya pili.Kulia ni Balozi wa Ufaransa nchini Frederic Clavier.

Balozi wa Ufaransa nchini Tanzania Frederic Clavier (kulia)akizungumza kabla ya baadhi ya watumishi wa Wizara ya Mambo ya Nje na Ushirikiano wa Afrika Mashariki kukabidhiwa vyeti vya kuhitimu kozi za lugha ya Kifaransa.Katikati ni Mkurugenzi wa Idara ya Diaspora katika Wizara ya Mambo ya Nje na Ushirikiano wa Afrika Mashariki Balozi Anisa Mbega na wa kwanza kushoto ni Mkurugenzi Msaidizi wa Kituo cha Utamaduni cha Ufaransa jijini Dar es Salaam Anissa Boukerche.

Sehemu ya watumishi wa Wizara ya Mambo ya Nje na Ushirikiano wa Afrika Mashariki wakiwa kwenye tukio la kutunukiwa vyeti vya kuhitimu kozi fupi za lugha ya Kifaransa.Mgeni rasmi kwenye tukio hilo alikuwa Mkurugenzi wa Idara ya Diaspora Balozi Anisa Mbega aliyemuwakilisha Katibu Mkuu wa Wizara hiyo.

Mkurugenzi wa Idara ya Diaspora katika Wizara ya Mambo ya Nje na Ushirikiano wa Afrika Mashariki Balozi Anisa Mbega akizungumzia umuhimu wa watumishi wa Wizara hiyo kufahamu lugha zaidi ya mmoja wakati akitoa risala kwenye tukio la baadhi ya watumishi wa Wizara hiyo kuhitmu kozi fupi za lugha ya Kifaransa.Wapili kulia ni Balozi wa Ufaransa nchini Frederic Clavier.

Balozi wa Ufaransa nchini Tanzania Frederic Clavier(wapili kulia) akisisitiza jambo mbele ya watumishi wa Wizara ya Mambo ya Nje na Ushirikiano wa Afrika Mashariki ambao baadhi yao wamehitimu kozi fupi za lugha ya Kifaransa.

Agnes Tengia wa Idara ya Ulaya na Amerika (wa kwanza kulia) katika Wizara ya Mambo ya Nje na Ushirikiano wa Afrika Mashariki akiwa ameshikiwa kipaza sauti na Mkuu Uhusiano na Utamaduni katika Ubalozi wa Ufaransa nchini Tanzania Cecile Frobert (wa pili kulia) wakati akitoa hotuba ya shukrani baada ya yeye na baadhi ya watumishi wa Wizara hiyo kuhitimu kozi fupi la lugha ya Kifaransa.Katikati ni Balozi wa Ufaransa nchini Frederic Clavier na wa pili kushoto ni Mkurugenzi wa Idara ya Diaspora katika Wizara ya Mambo ya Nje na Ushirikiano wa Afrika Mashariki Balozi Anisa Mbega.

Mkurugenzi Msaidi wa Kituo cha Utamaduni cha Ufaransa jijini Dar es Salaam Anissa Boukerche akizungumza kuhusu watumishi wa Wizara ya Mambo ya Nje na Ushirikiano wa Afrika Mashariki ambao wamehitimu kozi fupi za lugha ya Kifaransa kwenye kituo hicho na leo wamekabidhiwa vyeti vyao.

Watumishi wa Wizara ya Mambo ya Nje na Ushirikiano wa Afrika Mashariki wakisubiria kukabidhiwa vyeti vyao baada ya kuhitimu kozi fupi za lugha ya Kifaransa.

Matukio mbalimbali katika picha wakati watumishi wa Wizara ya Mambo ya Nje na Ushirikiano wa Afrika Mashariki wakikabidhiwa vyeti vyao baada ya kuhitimu kozi fupi za lugha ya Kifaransa.

 

Na Said Mwishehe, Michuzi TV

WIZARA ya Mambo ya Nje na Ushirikiano wa Afrika Mashariki kwa kushirikiana na Ubalozi wa Ufaransa nchini wamefanikisha mafunzo ya kozi fupi ya lugha ya Kifaransa kwa baadhi ya watumishi wa Wizara hiyo kama sehemu ya kuwajengea uelewa wa kufahamu lugha zaidi ya moja.

Akizungumza leo wakati wa tukio la kukabidhi vyeti kwa watumishi hao waliojifunza lugha hiyo kwenye Kituo cha Utamaduni cha Ufaransa jijini Dar es Salaam , Mkurugenzi wa Idara ya Diaspora Wizara ya Mambo ya Nje na Ushirikiano wa Afrika Mashariki Balozi Anisa Mbaga amesema uhusiano mzuri baina ya nchi hizo mbili ndio uliosababisha watumishi hao kupata fursa ya kujifunza lugha hiyo.

"Serikali ya Tanzania na watanzania pamoja na Serikali ya Ufaransa na watu wa Ufaransa wamekuwa na uhusiano mzuri, lakini pia juhudi za Waziri wa Mambo ya Nje na Ushirikiano wa Afrika Mashariki Liberata Mulamula pamoja na viongozi wengine wa Wizara hiyo ambao waliomba Ubalozi wa Ufaransa kutoa mafunzo mafupi ya lugha hiyo kwa ajili ya kuwajengea uwezo watumishi wa Wizara ya Mambo ya Nje na Ushirikiano wa Afrika Mashariki.

"Kama tunavyofahamu Wizara yetu inahusika na mashirikiano kati yetu na nchi nyingine , kwa hiyo kupata uelewa wa lugha zaidi ya moja kwa watumishi wa Wizara yetu ni nyenzo na muhimu katika kutekeleza majukumu ya kila siku.Ni muhimu sana kwa watumishi wetu kufahamu lugha zaidi ya moja , tunao watumishi ambao wanafahamu Kifaransa lakini wapo hatua ya chini.

"Hivyo Wizara inaendelea na jitihada za kuendelea kuwajengea uwezo watumishi ili kuwawezesha kufahamu lugha zaidi ya mmoja.Wengi wanafahamu Kingereza , hivyo kuongeza na Kifaransa ni hatua nzuri na muhimu kwani kuna nchi ambazo tunashirikiana nazo na zinazungumza Kifaransa,"amesema Balozi Mbaga ambaye kwenye tukio hilo alimuwakilisha Katibu Mkuu wa Wizara hiyo Balozi Joseph Sokoine.

Ameongeza kuhitimu kwa watumishi hao katika hatua ya kwanza na wengine hatua ya kati ya lugha ya Kifaransa sasa itasaidia sana kuwawezesha katika kutekeleza majukumu yao na watakapokutana na wana diplomasia wengine wanaotumia lugha hiyo itakuwa rahisi kuwasiliana na kutekeleza majukumu yao kikamilifu.

Kwa upande wake Balozi wa Ufaransa nchini Tanzania Frederic Clavier ametoa pongezi kwa Waziri wa Mambo ya Nje na Ushirikiano wa Afrika Mashariki Liberata Mulamula kwa kuona muhimu wa watumishi wa Wizara hiyo kupata mafunzo mafupi ya lugha ya Kifaransa kama sehemu ya kuwawezesha watumishi hao kuelewa lugha hiyo ili kurahisisha mawasiliano kati yao na nchi nyingine zinazoongea lugha ya Kifaransa.

Amesema lugha ya Kifaransa ni kati ya lugha ambazo zinazungumwa na mamilioni ya watu duniani kote, hivyo kwa Wizara ya Mambo ya Nje na Ushirikiano wa Afrika Mashariki ni hatua nzuri na kwamba Serikali ya Ufaransa itaendelea kushirikiana na Tanzania katika nyanja mbalimbali ikiwemo hiyo ya kuhakikisha lugha za nchi hizo mbili zinafundishwa na kuenezwa kwa pande zote.

"Watumishi wa Wizara ya Mambo ya Nje ambao wamepata fursa hii wapo ambao wamejifunza hatua ya mwanzo kabisa na wengine wamejifunza hatua ya kati , hivyo bado wanayo nafasi ya kujiendeleza ili kuifahamu vema lugha ya Kifaransa,"amesema Balozi Clavier na kuongeza kuwa idadi ya wanaotumia lugha ya Kifaransa duniani imekuwa ikiongezeka siku hadi siku.

Mmoja ya watumishi wa Wizara ya Mambo ya Nje na Ushirikiano wa Afrika Mashariki Amos Tengu anayetokea kitengo cha Diaspora amesema wamekuwa kwenye mafunzo kwa wiki tatu, hivyo wanaishukuru Wizara kwa kushirikiana na Ubalozi wa Ufaransa kufanikisha mafunzo hayo ya Kifaransa.

"Kama mnavyofahamu Wizara ya Mambo ya Nje kutokana na kusimamia masuala yake mbalimbali kwa kushirikiana na nchi za nje maana yake kuna kunakuwa na muingiliano na lugha ya Kifaransa ni lugha ya kimataifa na kwa Afrika katika nchi 56 , nchi 26 zinaongea kifaransa. Balozi wa Ufaransa nchini Tanzania amezungumzia ukubwa wa lugha hii na idadi ya watu wanaoizungumza,"amesema Tengu.

Ameongeza  kwa wao kufahamu lugha hiyo inasaidia kwenye mawasiliano na kwamba wanatumia lugha ya Kingereza lakini kuna nchi nyingine ambazo zinatumia Kifaransa , hivyo kufahamu lugha hiyo ni muhimu na bahati nzuri wengi ambao wamejifunza hasa wale wa hatua ya mwanzo wameahidi kuendelea na wale ambao wamejifunza hatua ya kati nao wanataka kuendelea zaidi.

"Kifaransa nacho kina hatua zake, kuna hatua ya kuanzia awali hadi hatua ya juu kabisa, kwa sisi wengine angalau tunakijua Kifaransa lakini tunatamani kufahamu kwa hatua kubwa zaidi.Hivyo niseme tunashukuru Wizara yetu kwa kutambua umuhimu wa kutuwezesha kupata mafunzo haya ingawa kwa maoni yetu ambao tumepata mafunzo tunasema wiki tatu hazitoshi, tunahitaji muda mrefu zaidi ili kuifahamu vema lugha hii,"amesema Tengu.

Mafunzo ya Ufugaji Bora na Matibabu, Jiunge sasa kwa KUBOFYA HAPA