Katibu Mkuu wa JOWUTA, Suleiman Msuya kulia akimkabidhi Mwakilishi wa MICHUZI MEDIA GROUP (MMG), Avila Kakingo barakoa kwaajili ya waandishi wa chombo chake cha habari jijini Dar es Salaam leo, ili waweze kujikinga na maambukizi ya virusi vya Corona (COVID 19) wawapo kazini.
Katibu Mkuu wa JOWUTA, Suleiman Msuya kulia akimkabidhi Mwakilishi wa MICHUZI MEDIA GROUP (MMG), Avila Kakingo barakoa kwaajili ya waandishi wa chombo chake cha habari jijini Dar es Salaam leo, ili waweze kujikinga na maambukizi ya virusi vya Corona (COVID 19) wawapo kazini.Na Mwandishi wetu.
KAMPUNI ya ASAS imetoa msaada wa Barakoa (Masks) 1,000 kwa waandishi wa habari wa vyombo mbalimbali vya habari vya jijini Dar es Salaam leo ili waweze kujikinga na maambukizi ya virusi vya corona vinavyosababisha ugonjwa wa COVID-19.
Msaada huo umetolewa na kampuni hiyo kwa Chama cha Wafanyakazi wa Vyombo Habari Tanzania (JOWUTA), ili kuwapatia wanachama wake na waandishi kwa ujumla.
Akizungumzia msaada huo Mkurugenzi wa Uzalishaji wa Kampuni ya ASAS, Ahmed Salim alisema wameamua kusaidia kundi hilo kutokana na mchango wake kwa jamii katika kipindi hiki cha corona.
Mkurugenzi huyo amesema waandishi wa habari kazi zao zinahitaji kukutana na watu mbalimbali hivyo wanapaswa kuwa na vifaa vya kujikinga na maambukizi hivyo kampuni hiyo inaamini imetoa msaada sehemu sahihi.
“Nyie ni watu muhimu katika kuhabarisha jamii kuhusu maambukizi ya corona hivyo ni imani yetu kuwa Barakoa hizi 1,000 zitasaidia kwa muda na tutaendelea kushirikiana na JOWUTA kusaidia hali ikiruhusu,” alisema.
Salim amesema iwapo waandishi watapata maambukizi jamii itakosa taarifa sahihi za COVID-19, hivyo kuwataka wadau wengine kulisaidia kundi hilo muhimu kwa maendeleo ya nchi na wananchi.
Mkurugenzi huyo amewaomba waandishi kuzingatia misingi, kanuni na sharia zinazosimamia taaluma yao kwa kuandika habari za kweli ili kutopotosha wananchi.
“Tumekuwa tukitoa misaada kama hii kwa makundi mbalimbali, hivyo basi sisi tunaamini nyie ni watu sahihi na mtazitumia kwa maslahi mapana ya kazi zenu kwa kuzingatia maadili,” alisema.
Amesema wametoa Barakoa, vitakasa mikono, mashine ya kupulizia mwili mzima, ndoo na vingine lengo likiwa ni kusaidia jamii ambayo kwa namna moja au nyingine inatumia malighafi za ASAS.
Akizungumzia msaada huo Katibu Mkuu wa JOWUTA, Suleiman Msuya amepongeza Kampuni ASAS kuwakumbuka waandishi wa habari wa Dar es Salaam ambao walikuwa wanapitia changamoto ya uhaba wa vifaa hivyo.
Msuya amesema waandishi wa habari walikuwa wanapata wakati mgumu wa kutafuta habari kutokana na mambukizi ya corona kusambaa jijini Dar es Salaam lakini kupitia msaada huo wa ASAS watakuwa wamepata suluhu kwa muda.
“Tunaishukuru Kampuni ya ASAS kwa msaada huu wa Barakoa 1,000 zitatusaidia sana katika kipindi hiki kigumu naamini sasa tutafanya kazi kwa uhuru na hata tukiandika habari na makala za kusisitiza uvaaji barakoa tunaonekana kwa mfano,” alisema Msuya.
Katibu huyo amewataka waandishi wa habari na vyombo vya habari nchini kuzingatia maandili ya uandishi hasa katika kipindi hiki ambacho dunia inapitia wakati mgumu.
Msuya ametoa rai kwa waandishi wa habari kuepuka kutumika katika kipindi hiki kwani madhara yake yanaweza kuwa makubwa.
Hata Hivyo MICHUZI MEDIA GROUP (MMG) wamekishukuru chama cha wafanyakazi wa Vyombo vya habari Tanzania (JOWUTA) kwa kuwapa waandishi wake Barakoa kwaajili ya kujikinga na maambuki ya Virusi vya Corona (covid 19).
"Shukrani kwa JOWUTA na Kampuni ya maziwa ya ASAS kwa kuona mchango wa waandishi wa vyombo vya habari hapa nchini ili waendelee kuhabarisha umma kwa maendeleo ya Taifa na ustawi wa nchi yetu". Amesema Mwakilishi wa MMG, Ahmed Michuzi.
Mafunzo ya Ufugaji Bora na Matibabu, Jiunge sasa kwa KUBOFYA HAPA
Post a Comment