HAKI YA MTOTO WA KIKE ILINDWE ILI KUJENGA JAMII BORA NA TAIFA SHUPAVU-SAVE THE CHILDREN | Tarimo Blog

Meneja wa Uchechemuzi na Kampeni kutoka Save The Children, Nuria Mshare akizungumza na waandishi wa habari wakati wa warsha maalumu ya maadhimisho ya siku ya Mtoto wa kike duniani, Nuria amesema kuwa ni wajibu wa Serikali, jamii na wadau mbalimbali kuhakikisha mtoto wa kike anapata haki za msingi ikiwemo elimu na kushirikishwa katika kufanya maamuzi, leo Jijini Dar es Salaam.

Meneja wa Mradi wa Ulinzi kwa Mtoto Jesca Ndana kutoka Save The Children, akizungumza na waandishi wa habari wakati wa maadhimisho ya siku ya Mtoto wa kike duniani ambapo amesema kuwa Save The Children katika maadhimisho hayo wameangalia na kutafuta mbinu za utatuzi wa changamoto zinazowakumba Watoto wa kike kutoka makundi ya waliopata elimu na wasiopata elimu, leo jijini Dar es Salaam.

Wakili wa kujitegemea Sarah Mhamilawa akizungumza na waandishi wa habari katika maadhimisho ya siku ya Mtoto wa kike duniani yaliyoandaliwa na Shirika la Save The Children, Sarah ameeleza kuwa hakuna kinachozuia watoto wa kike wasitimize malengo yao na kupitia maadhimisho hayo wameonesha kwa vitendo kuwa kila kitu kinawezekana kwao, leo jijini Dar es Salaam.

Mwakilishi wa Watoto wa kike Sarafina Frank kutoka shule ya Sekondari Mikocheni akizungumza na waandishi wa habari wakati wa maadhimisho ya siku ya Mtoto wa kike duniani yaliyoadhimishwa na Shirika la Save The Children, Sarah ameiomba Serikali kutoa vipaumbele kwa Watoto wa kike ikiwa ni pamoja na kuboresha miundombinu ya shule ili waweze kufurahia masomo yao, leo jijini Dar es Salaam.

Watoto wa kike na baadhi ya wavulana wakiwa katika maadhimisho ya siku ya Mtoto wa kike duniani yaliyoandaliwa na Shirika la Save The Children na kubeba kauli mbiu ya ''Tumuwezeshe Mtoto wa Kike Kujenga Taifa Lenye Usawa.'' leo jijini Dar es Salaam.

Na Leandra Gabriel, Michuzi TV

SHIRIKA lisilo la kiserikali la Save The Children limeungana na ulimwengu katika kuadhimisha siku ya Mtoto wa kike ulimwenguni kwa kuwakutanisha watoto wa kike pamoja na wanawake waliofanikiwa katika fani mbalimbali   na kujadili changamoto zinazowakabili sambamba na kuzipatia suluhu,  huku kauli mbiu ya maadhimisho hayo ikielekezwa kwa jamii, Serikali na wadau mbalimbali kushiriki katika kulinda haki za Mtoto wa kike dhidi ya vitendo vya ukatili.

Akizungumza katika maadhimisho hayo Meneja wa Uchechemuzi na Kampeni, Nuria Mshare amesema kuwa maadhimisho hayo yanayokwenda na kauli mbiu ya "Tumuwezeshe Mtoto wa Kike Kujenga Taifa Taifa lenye Usawa"  yameenda sambamba na kuhamasisha jamii, Serikali na wadau mbalimbali kuhakikisha watoto wa kike wanapata mahitaji ya msingi ikiwemo elimu, afya na lishe bora ili kujenga taifa bora lenye jamii shupavu.

"Maadhimisho haya yanaenda sambamba na uzinduzi wa ripoti ya kimataifa ya Save The Children inayohudumia nchi 120 duniani na mambo yatakayojadiliwa na kufanyiwa kazi ni pamoja na malengo ya mkutano wa Beijing ambao umeweka mwelekeo wa hatua za usawa wa kijinsia.'' Amesema.

Amesema kuwa ripoti hiyo inaonesha  masuala ya ndoa za utotoni katika ukanda wa jangwa la sahara yameongezeka mara mbili zaidi.

"Jukumu la kutokomeza masuala ya ndoa na mimba za utotoni ni la kwetu sote ikihusisha jamii, Serikali na wadau mbalimbali na kubwa zaidi ni kumshirikisha mtoto wa kike katika kufanya maamuzi na sauti zao kusikilizwa" amesema Nuria.

Pia Meneja wa mradi wa Ulinzi kwa mtoto, Haki na Utawala  kutoka Save The Children  Jesca Ndana, amesema maadhimisho ya siku ya Mtoto wa KIKE ulimwenguni mwaka huu yamekuja na mapendekezo kutoka kwa watoto hao waliohitaji kukaa na wanawake waliofanikiwa ili waweze kujifunza, kuhamasika na kubadilishana uzoefu ili waweze kuyafikia malengo.

"Watoto wa kike waliokutanika hapa watapata nafasi ya kukutana na wanasheria, madaktari, wahandisi na marubani ambao watawaongoza katika maadili katika kufanikisha ndoto zao" amesema.

Pia amesema kuwa katika maadhimisho hayo wataangalia makundi yote ya watoto wakike waliopata elimu na wale wasiopata elimu.

"Elimu ni haki ya msingi kwa watoto wa kike katika kuleta matokeo chanya katika jamii, na ni wajibu wa kila mtu kuhakikisha mtoto wa kike anapata haki hii ya msingi bila changamoto zozote" amesema.

Akiwawakilisha watoto wa kike waliohudhuria maadhimisho hayo Sarafina Frank kutoka shule ya Sekondari Mikocheni, ameiomba Serikali kutambua umuhimu wa mtoto wa kike kwa kuwapa vipaumbele ikiwa ni pamoja na kuboresha miundombinu mashuleni ili waweze kufurahia masomo yao.

Pia ameishukuru Save the Children kwa kuwakutanisha watoto kutoka sehemu mbalimbali na kupata wasaa mzuri wakubadilishana mawazo pamoja na kujadili na kupeana mbinu za kutatua changamoto zinazowakabili.

 

Mafunzo ya Ufugaji Bora na Matibabu, Jiunge sasa kwa KUBOFYA HAPA