TFCG WILAYA YA KILOLO WAANDAA MIPANGO YA USIMAMIZI SHIRIKISHI WA MISITU | Tarimo Blog

Meneja Mradi wa CoForEST Charles Leoard(kulia) akielezea jambo mbele ya wadau mbalimbali wa uhifadhi wa misitu na mazingira baada ya kutembelea kijiji cha Mahenge wilayani Kilolo mkoani Iringa kwa ajili ya kuangalia jinsi ambavyo wananchi wanatekeleza mradi wa kuhifadhi misitu kwa kuwezesha biashara endelevu ya mazao ya misitu nchini.Miradi hiyo inatekelezwa na Shirika la Kuhifadhi Misitu ya Asili Tanzania(TFCG) Mtandao wa Jamii wa Usimamizi wa Misitu Tanzania(MJUMITA).

Mtendaji wa Kijiji cha Mahenge  Wilson Magembe(katikati) akifafanua jambo kuhusu kijiji hicho ambavyo kimejipanga katika kutekeleza miradi hiyo na hasa uzalishaji mkaa kwa njia ambazo zitakuwa endelevu bila kuharibu mazingira yanayowazunguka.Wengine ni wadau wa uhifadhi wa mazingira na wana kijiji wakimsikiliza.

Ofisa Misitu wa Halmashauri ya Wilaya ya Kilolo mkoani Iringa Aigen Mwilafi(aliyesimama) akifafanua jambo wakati anaelezea jinsi walivyojipanga katika kutekeleza mradi wa kuhifadhi misitu kwa kuwezesha biashara endelevu ya mazao ya misitu.

Mwenyekiti wa Kijiji cha Mahenge wilayani Kilolo mkoani Iringa Said Halfan akizungumza mbele ya wadau wa uhifadhi wa misitu na mazingira.

Mkurugenzi wa Shirika la Kuhifadhi Misitu ya Asili Tanzania(TFCG)Charles Meshack na Mkurugenzi Mtandao wa Jamii wa Usimamizi wa Misitu Tanzania(MJUMITA) Rahima Njaidi wakiwa makini kufuatilia majadiliano kuhusu utekelezaji wa uhifadhi wa misitu a utunzaji wa mazingira.

Mkuu wa Idara ya Ajira na Kipato kutoka Ubalozi wa Uswisi nchini Tanzania Peter Sidler akielezea namna ambavyo wanafurahishwa na utekelezaji wa miradi hiyo ambayo wamekuwa wakiifadhili baada ya kupata taarifa kuhusu utekelezaji wa miradi ya uhifadhi wa misitu na mazingira katika kijiji cha Mahenge wilayani Kilolo mkoani Iringa.

Wadau wa uhifadhi wa misitu na mazingita wakiwemo Shirika la Kuhifadhi Misitu ya Asili Tanzania(TFCG) Mtandao wa Jamii wa Usimamizi wa Misitu Tanzania(MJUMITA), maofisa wa idara mbalimbali za mazingira kutoka serikalini pamoja na maofisa wa ubalozi wa Uswisi wakielekea kwenye maeneo ya misitu kuona shughuli za utunzaji misitu ya asili zinavyotekelezwa na wanakijiji cha Mahenge.

Mkazi wa Kijiji cha Mahenge wilayani Kilolo mkoani Iringa Keyaa Macho(kushoto) akimvalisha vazi la kimasai Mkuu wa Idara ya Ajira na Kipato kutoka Ubalozi wa Uswisi nchini Tanzania Peter Sidler baada ya kumaliza kikao cha wadau wa uhifadhi wa misitu na utunzaji wa mazingira kilichofanyika katika kijiji cha Mahenge.

Muonekano wa tanuru la kuzalisha mkaa likiwa linaendelea kuwaka baada ya wananchi ambao wanahusika na uzalishaji huo wa mkaa kutumia njia za kisasa ambazo ni rafiki wa mazingira.

Na Said Mwishehe,Iringa 

SHIRIKA la Kuhifadhi Misitu ya Asili Tanzania (TFCG)na wadau wake kwa kushirikiana na na Halmashauri ya Wilaya ya Kilolo mkoani Iringa limewezesha uandaaji wa mipango ya usimamizi shirikishi wa misitu ya vijiji na mipango ya matumizi bora ya ardhi.

Pamoja na hayo Halmashauri ya Wilaya ya Kilolo imetoa ombi kwa TFCG pamoja na wadau wake waendelee kuiwezesha halmashauri hiyo katika suala la uhifadhi wa misitu ya vijiji kwa kuitenga na kuhuwisha mipango ya usimamizi shirikishi ya vijiji iliyopitwana wakati.

Hayo yameelezwa leo na Mratibu wa Mradi wa Kuhifadhi Misitu kwa Kuwezesha Biashara ya Mazao ya Misitu Tanzania(CoforEST)Aigen Mwilafi ambaye pia ni Ofisa Misitu Wilaya ya Kilolo mkoani Iringa.

Wakati akieleza hayo waliwepo wadau mbalimbali wakiwemo TFCG, Mtandao wa Jamii wa Usimamizi wa Misitu Tanzania(MJUMITA),maofisa wanaosimamia mazingira kutoka serikalini, Maofisa wa Ubalozi wa Uswisi ambao ndio wafadhili na wadau wengine wa sekta ya misitu na uhifadhi wa mazingira nchini.

Aidha amesema kuna takribani misitu 11 haijatengwa kuwa misitu ya hifadhi ya vijiji na kuna mipango ya usimamizi shirikishi wa misitu ya vijiji 45 imepitwa na wakati inahitaji kuhuhishwa.

Hivyo wangependa misitu yote katika vijiji vyao itengwe na kuwa misitu ya hifadhi ya vijiji na iwe na mipango iliyohuwishwa na kupitishwa katika ngazi zote za kisheria."Tunaomba muendelee kushirkiana nasi katika kutekeleza hayo."

Ametumia nafasi hiyo kueleza TFCG imekuwa ikifanya kazi za uhifadhi kwa kushirikiana na halmashauri ya Wilaya ya Kololo tangu mwaka 2007 na kwamba TFCG na MJUMITA kwa kushirikiana na halmashauri iliunda mtandao mitandao ya jamii ya usimamizi wa misitu ya asili minne.

Ameongeza na kuanzisha mpango wa uvunaji wa mazao wa mazao ya misitu wa Wilaya.Pia kuanzisha mitandao mingine mipya katika kata za Mahenge na Nyanzwa na kwamba mwanzoni mwa Machi 2020 timu ya watalaam wa mradi kwa kushirikiana na halmashauri walitembelea vijiji vya Ikula, Mahenge, Mgowelo na Udekwa kwa lengo la kutembelea misitu na kuona kama inakidhi vigezo vya kutekelezwa mradi wa mkaa endelevu na kuzungumza na viongozi wa vijiji husika.

"TFCG na wadau wake kupitia mradi huu ,mpaka sasa imeweza kuwajengea uwezo watalaam 17 kutoka ngazi ya halmashauri  na wanne kutoka ngazi ya kata kwa kutoa mafunzo mbalimbali.Kijiji cha Mahenge ambacho ndicho kinatekeleza mradi huu kumefanyika mikutano ya vitongoji kwa ajili ya kuutambulisha mradi.

"Pia kuandaa mipango ya matumizi bora ya ardhi, mipango ya usimamizi shirikishi wa misitu ya kijiji na kupitishwa na mkutano mkuu wa kijiji.Kuna mafunzo yanaendelea ya uzalishaji mkaa endelevu na uzalishaji wa mbao,kwa wazalishaji mkaa na wapasuaji mbao ambao walikuwa wanajishughulisha na shughuli hizo hapa kijijini bila kufuata taratibu,"amesema Mwalifi.

Kwa upande wa Mkurugenzi wa MJUMITA, Rahima Njaidi amesema TFCG na MJUMITA wamedhamiria kuleta mabadiliko chanya kwenye sekta ya misitu na mazingira nchini na wanaamini kwa ushirikiano uliopo kati yao na wadau wengine wakiwemo wananchi wa maeneo ambayo miradi inatekekelezwa mafanikio makubwa yatapatikana na kuleta tija kwa umma.

Wakati huo huo Mwenyekiti wa Kijiji cha Mahenge wilayani Kilolo Said Halfan Muhina amesema wameomba msaada wa kupatiwa mafunzo zaidi ambapo amefafanua licha ya kuelimishwa bado wanaomba waendelee kupatiwa elimu zaidi na kwamba wanamini kile ambacho kitapatikana kitasaidia kuleta maendeleo ya kijiji chao.

Mafunzo ya Ufugaji Bora na Matibabu, Jiunge sasa kwa KUBOFYA HAPA