VYAMA VYA MSINGI WILAYANI NAMTUMBO WASHANGAA KUTOFANYIKA KWA UCHAGUZI CHAMA KIKUU | Tarimo Blog

Na Yeremias  Ngerangera…Namtumbo.

VYAMA vya msingi  wilayani Namtumbo  mkoani Ruvuma  vimelalamikia kuchelewa   kwa uchaguzi chama kikuu cha ushirika (union) kwa  zaidi ya miezi mitano toka  kumaliza kwa uchaguzi wa viongozi wa vyama vya msingi.

Wakizungumza katika kikao  kazi  katika ukumbi wa  Halmashauri ya wilaya ya Namtumbo viongozi wa vyama hao walisema wanashangaa kwa nini uchaguzi wa chama kikuu (UNION) haufanyiki  na hivi sasa ni zaidi ya miezi mitano imepita toka kumalizika kwa uchaguzi wa vyama vya msingi.

“Kikanuni mrajisi  wa vyama vya ushirika amepewa  uwezo wa kuvunja bodi  iliyomaliza muda wake na kuweka bodi  ya muda kutoka kwa wajumbe wapya  waliochaguliwa kwenye vyama vya msingi  huku tukisubiria uchaguzi, lakini tunashangaa kuendelea kufanya nao kazi  viongozi ambao wanajua muda wao umekwisha kuna nini hapo?” Alisema bwana  Hassani  Darajani mwenyekiti  wa chama cha msingi Mgombasi.

Aidha walitahadharisha kuwa ikitokea ubadirifu wa mali za wanaushirika  zigo hilo atabebeshwa  mrajisi  wa  vyama vya ushirika mkoa wa Ruvuma kwa kuwa  yeye  ndiye aliyepewa  dhamana  ya kuvunja bodi  iliyomaliza muda wake na kuweka  bodi mpya kutoka kwa wajumbe wapya waliochaguliwa kwenye vyama  vya msingi.

Jafari  Gunda  kwa upande wake alidai wanahitaji uchaguzi wa chama kikuu ufanyike haraka  kwa kuwa  kuna dalili za vyama vya msingi kukopeshwa  pembejeo zaidi ya makisio ya vyama vya msingi na hiyo ni hatari kwa ustawi wa vyama vya msingi kwa kuwa wanaongezewa mzigo  tofauti na makisio yao.

Afisa ushirika wa wilaya ya Namtumbo  bwana Emmanuel  Gwao  pamoja na kuwashukuru viongozi wa vyama vya msingi kwa kusimamia vyema  ununuzi wa mazao kwa njia ya stakabadhi ghalani aliwataka kujipanga upya  katika kujiandaa  kununua mazao  katika msimu  ujao  wa kilimo.

Bwana Gwao aliwataka  viongozi hao pia  kuvuta subira kwani uchaguzi wa chama kikuu  upo mbioni kufanyika hivyo waondoe hofu kwa kuwa serikali  ipo inasimamia,  hakuna kitu kitakachoharibika alisema bwana  Gwao.

Wilaya  ya  Namtumbo  inajumla ya kata 21 zilizobahitika kupata ardhi nzuri  yenye rutuba  inayokubali mazao ya chakula na biashara  na katika kata hizo kuna jumla ya vyama vya msingi  44 ambapo  kata 19 zina vyama  vya  msingi 2 na kata  mbili  zina vyama vya msingi vitatu.

Mafunzo ya Ufugaji Bora na Matibabu, Jiunge sasa kwa KUBOFYA HAPA