WAZEE wa Wilayani Busega kupatiwa Bima ya Afya (CHF) ili kuondoa kero ya matibabu kwa kundi hilo. Hayo yamebainishwa wakati wa kikao cha Mkuu wa Wilaya ya Busega Mhe. Gabriel Zakaria na wazee wa Wilaya ya Busega kilichofanyika Shule ya Msingi Nyashimo.
Mkurugenzi Mtendaji wa Halmashauri ya Wilaya ya Busega Bw. Anderson Kabuko amesema tayari upo mpango wa kuwapatia Bima ya Afya wazee 14,000 ambapo ili kupunguza changamoto ya matibabu kwa wazee, wazee wapatao 6,000 wataanza kupatiwa Bima hizo.
Awali Akisoma taarifa ya Wazee, Afisa Ustawi wa Jamii Wilaya ya Busega Bw. Kubagwa Madalia amesema wazee wanashiriki kwa ukaribu katika vikao mbalimbali vya maamuzi, ikiwemo vikao vya baraza la madiwani na vingine vinavyotambulika kisheria.
Mkuu wa Wilaya ya Busega Mhe. Gabriel Zakaria amesema yupo tayari kutatua changamoto na kero mbalimbali zinazowakabili wazee na kuahidi kwamba ataimarisha ulinzi na usalama kwa wazee na hakuna vitendo vitakavyohatarisha usalama wao. Pia Mhe. Zakaria amesema kwamba yupo tayari kushirikiana na wazee katika kukuza maendeleo na kuwataka wazee waliohudhuria kikao hicho kuwa mabalozi na kuzipeleka salam kwa wazee wote wilayani Busega.
Mkuu wa Wilaya ya Busega Mhe. Gabriel Zakaria ameanza utaratibu wa kuongea na makundi mbalimbali wilayani Busega ikiwa ni kujitambulisha kwa makundi hayo na ameanza na kundi la wazee.
Mkuu wa Wilaya ya Busega Mhe. Gabriel Zakaria Atilia Mkazo Kuongeza Tija ya Uzalishaji zao Pamba
Mkuu wa Wilaya ya Busega Mhe. Gabriel Zakaria.
Mkuu wa Wilaya ya Busega Mhe. Gabriel Zakaria ametilia mkazo wa kuongeza tija ya uzalishaji wa zao la Pamba. Mhe. Zakaria Amesema ni wakati sasa umefika kubadilisha mitazamo ya kilimo cha zao la Pamba Wilayani Busega. Ameyasema hayo wakati wa kikao cha majumuisho ya tathmini ya kampeni ya kuongeza tija ya uzalishaji wa zao la Pamba, kikao kilichofanyika katika ukumbi wa Simba wa Yuda na kuhudhuriwa na wadau mbalimbali.
Mhe. Zakaria amesema ni wajibu wa viongozi wa Wilaya kusimamia kwa ukaribu shughuli za kilimo cha Pamba ili kufikia malengo ya Wilaya ya kuzalisha tani 50,000 katika msimu ujao wa kilimo. Mhe. Zakaria amewataka Maafisa Ugani kupitia Idara ya kilimo kuhakikisha suala hilo ni moja ya kipaumbele katika majukumu yao, na kusisitiza kwamba atasimamia kwa ukaribu utekelezaji wake. “Nawategemea wataalam wa kilimo, nina imani kwamba Busega tutafikia lengo la kuongeza tija ya uzalishaji wa zao la Pamba kwasababu mmepata mafunzo na kanuni bora za kilimo cha zao la Pamba”. Aliongeza Mhe. Zakaria.
Kwa upande mwingine, Mhe. Zakaria ameahidi kutoa pongezi kwa wote watakaozalisha kwa kiasi kikubwa zao la Pamba Wilayani Busega. “Vijiji 5 vitakavyofanya vizuri katika uzalishaji wa zao la Pamba tutavipongeza” alisema Mhe. Zakaria.
Awali, Balozi wa zao la Pamba Kitaifa, Bw. Aggrey Mwanri amesema kilimo cha zao la Pamba kinahitaji usimamizi na kanuni za kilimo, ambazo zitamuwezesha Mkulima kuzalisha kwa tija. Bw. Mwanri amesema kanuni muhimu zikiwemo matumizi ya Mbolea, kupanda kwa kufuata nafasi zilizopendekezwa na wataalam na matumizi ya mbegu bora, ni miongoni mwa mambo muhimu katika kuongeza tija ya zao la Pamba. Aidha, Mwanri amesema kilimo cha Pamba kinaweza kubadilisha maisha ya wananchi wa Busega kiuchumi kama kutakuwa na mkakati madhubuti wa uzalishaji wenye tija.
Kaimu Mkurugenzi Mtendaji Halmashauri ya Wilaya ya Busega Bw. Burilo Deya amesema tayari mikakati imewekwa ikiwa na malengo ya kuongeza tija ya uzalishaji wa zao la Pamba ikiwemo, Maafisa Ugani kupatiwa mafunzo ya kilimo cha uzalishaji wenye tija wa zao la Pamba, mafunzo yaliyofanyika mwezi wa nne mwishoni mwaka huu katika kituo cha utafiti wa kilimo Ukiriguru kilichopo mkoani Mwanza.
Aidha, Bw. Deya ametaja mikakati mingine ikiwemo kuanzisha mashamba darasa, kuwajengea uwezo Serikali za vijiji kuhusu uzalishaji wa zao la Pamba, kuendelea kuwajengea uwezo viongozi juu ya uzalishaji wa zao la Pamba ikiwemo wawakilishi wa wananchi na kuendelea kushirikiana kwa ukaribu na Wataalam na Bodi ya Pamba katika uzalishaji wa zao hilo. Bw. Deya ameongeza kwamba lengo la Wilaya ya Busega ni kuongeza uzalishaji kutoka wastani wa kilo 200 kwa ekari kufikia kilo 700 kwa ekari kwa msimu ujao wa kilimo.
Washiriki wa Semina hiyo ya uhamashaji wa kuongeza tija ya zao la Pamba, wamesema ni jambo muhimu sana kwa Wakulima wa zao hilo Wilayani Busega kupata elimu ya uzalishaji wa zao la Pamba, ambayo itawasaidia kuongeza tija katika uzalishaji, hivyo watakwenda kuwa mabalozi wa kilimo cha Pamba. Lengo la Wilaya ya Busega ni kuzalisha tani 50,000, huku lengo la mkoa wa Simiyu ni kuzalisha tani 500,000. Wilaya ya Busega inaendelea na kampeni ya kuongeza tija ya uzalishaji wa kilimo cha zao la Pamba katika ngazi ya vijiji, ambapo mpaka sasa vijiji vipatavyo 23 vimepatiwa mafunzo.
Baraza La Madiwani Busega Lataka Uwepo wa Mahakama ya Wilaya; Lashauri Marekebisho Stendi ya Wilaya, Lahoji Uwezo wa TEMESA
Baraza la madiwani halmashauri ya Wilaya ya Busega limetaka uwepo wa Mahakama ya Wilaya Busega. Hayo yamesemwa na wajumbe wa baraza hilo wakati wa kikao cha baraza la madiwani robo ya tatu lililofanyika tarehe 04 Juni 2021 ukumbi wa Silisos.
Diwani kata ya Nyasimo Mhe. Mickness Mahela amehoji kuhusu suala la uwepo wa Mahakama wilayani Busega, akisema kwamba imekuwa kero kubwa kwa wakazi wa Busega wanapotaka kupata huduma ya mahakama, kwani inawalazimu kwenda Wilaya jirani ya Bariadi kupata huduma hiyo.
“Wilaya ya Busega ina takribani miaka tisa kwasasa, hivyo uwepo wa mahakama ni muhimu kwa wananchi wetu” aliongeza Mhe. Bi. Mickness Mahela. Wajumbe wa baraza hilo wamekiri kwamba uwepo wa mahakama ni suala lisilopingika, huku wakidai kwamba wilaya inahitaji mahakama ili kuondoa kero ya wakazi na wananchi wa Busega.
Akitoa ufafanuzi wa suala la uwepo wa mahakama wilayani Busega, mwakilishi kutoka Ofisi ya Mkuu wa wilaya Busega Bw. David Pallangyo anasema kwamba ni suala ambalo Ofisi ya Mkuu wa Wilaya imekua ikifuatilia kwa ukaribu na inaendelea na ufutiliaji. Kwa upande mwingine ameeleza kwamba licha ya watumishi wa mahakama kupangiwa kufanyia kazi zao wakiwa Busega lakini bado wanafanyia kazi zao wilayani Bariadi.
Aidha, hoja ya matengenezo ya magari iliibuliwa na wajumbe huku wakitaka uwepo wa gereji ya halmasuri ili kuwa na ufanisi wa matengenezo ya magari hayo kuliko kupeleka magari hayo kwa Wakala wa Ufundi wa Umeme na utengenezaji wa Magari ya Serikali (TEMESA). Akitoa ufafanuzi wa suala hilo Mkurugenzi Mtendaji Bw. Anderson Kabuko licha ya changamoto ya TEMESA, lakini tayari marekebisho na matengenezo madogo yanafanyika kwa baadhi ya magari na kazi hiyo inafanywa na fundi wa halmashauri.
Suala la stendi ya Wilaya ambayo imeanza kufanya kazi mwanzoni mwa mwezi wa tano mwaka huu, pia limepata wasaa wa kujadiliwa na baraza hilo. Mkurugenzi Mtendaji wa halmashauri ya Wilaya ya Busega Bw. Anderson Kabuko amesema tayari halmashauri imevunja mkataba na mkandarasi wa awali ambae alikuwa akijenga stendi hiyo kutokana na kutofikia ubora wa ujenzi, na tayari utaratibu unafanyika ili kumpata mkandarasi mwingine. Baraza hilo limetaka ujenzi wa wa stendi hiyo uboreshwe hasa njia za kupita magari ili kuondoa usumbufu na kero.
Akiahirisha kikao cha baraza hilo, Mwenyekiti wa halmashauri ya Wilaya ya Busega Mhe. Sundi Muniwe, ametaka kuendelea kwa juhudi ujenzi wa stendi ya Wilaya, na kuagiza kwamba kwasasa hatuhitaji mkandarasi, mhandisi wa ujenzi kwa kushirikiana na Meneja wa TARURA kufanya kazi ya ujenzi kuendelea na ujenzi wa stendi ya Wilaya, Nyashimo. Kwa upande mwingine ameomba viongozi wa mkoa kufuatilia suala la mahakama ili wilaya ya Busega iweze kupata mahakama.
Mafunzo ya Ufugaji Bora na Matibabu, Jiunge sasa kwa KUBOFYA HAPA
Post a Comment