WAZIRI MKUU MAJALIWA, SPIKA NDUGAI WAONGOZA MAPOKEZI YA TIMU YA BUNGE SPORTS CLUB IKIJIZOLEA JUMLA YA VIKOMBE 7 KATIKA MICHEZO YA EALA | Tarimo Blog

*Majaliwa aipongeza kwa kuibuka na makombe 7 kwenye mashindano hayo

 

WAZIRI MKUU Kassim Majaliwa ameipongeza timu ya Bunge baada ya kuibuka na makombe saba katika michezo mbalimbali kwenye Mashindano ya 11 ya Mabunge ya Jumuiya ya Afrika Mashariki yaliyomalizika hivi karibuni jijini Arusha.

 

Amesema kuwa wabunge hao wamefanya kazi kubwa ya kuipambania Tanzania na Bunge la Tanzania mbele ya nchi zote za Afrika Mashariki. “Ile kazi nzuri mliyoifanya ya kuipambania nchi, mmeleta zawadi kwa Rais Samia Suluhu Hassan kwa Watanzania na wabunge wengine.”

 

Waziri Mkuu ameyasema hayo jana (Jumamosi, Desemba 18, 2021) alipozipokea timu mbalimbali za Bunge katika viwanja vya Bunge jijini Dodoma. Timu ya Bunge imeshinda makombe kwenye michezo ya mpira wa miguu, pete, wavu kwa wanawake na wanaume, kikapu kwa wanawake na wanaume na mchezo wa kuvuta kamba wanaume.

 

“Ninaleta kwenu salamu za faraja kutoka kwa Rais wetu mpendwa Mheshimiwa Samia Suluhu Hassan kwa kazi kubwa mliyoifanya, na faraja nyingine ni kuona wachezaji wengi mmerudi salama, nidhamu mlioinesha katika mashindano haya imetujengea heshima kubwa”

 

Amesema kuwa ushindi wa timu hiyo unapeleka ujumbe kwenye timu nyingine zinazoshiriki mashindano mbalimbali ya kimataifa kushiriki kikamilifu na kuiwakilisha vyema nchi kwenye mashindano husika ikiwemo kuwa na matamanio ya kurudi na makombe.

 

“Tunatakiwa tuandike historia ya ubora wa michezo nchini ambapo tunaona kwasasa kila sekta inaenda vizuri na hata ile inayokuwa inakufa tunaifufua na hii pia imepelekea kupata heshima na sifa ya kupeleka timu yetu ya watu wenye ulemavu kwenye mashindano ya kombe la dunia”

 

Kwa upange wake, Spika wa Bunge Mheshimiwa Job Ndugai, amesema kupitia michezo hiyo wametoa somo kwa timu nyingine zilizoshiriki michezo hiyo na hatimaye kulipa heshima bunge “ahadi yetu sisi tutasimama na ninyi kwenye maandalizi zaidi mwakani na ninawapongeza sana kwa nidhamu mlioionesha hata mlipochokozwa hamkuchokozeka”

 

Naye, Meneja wa Timu hiyo Seif Gulamali amemshukuru Spika Ndugai kwa kuiwezesha timu hiyo kufanya vizuri kwenye mashindano hayo jambo lililowezesha kuibua morali na hatimaye kuibuka na makombe “kwa niaba ya wabunge wote tunaomba usituchoke sisi ni vijana wako, endelea kutulea, tunapoleta maombi yetu basi uyapokee kwa mikono miwili.”

 

Waziri Mkuu, Mhe. Kassim Majaliwa pamoja na Spika wa Bunge, Mhe. Job Ndugai wakiwa tayari kuwapokea wachezaji wa timu ya Bunge Sports Club watakapowasili katika viwanja vya Bunge Jijini Dodoma, Disemba 18, 2021, wakitokea Jijini Arusha katika michezo ya Mabunge ya Jumuiya ya Afrika Mashariki

Spika wa Bunge, Mhe. Job Ndugai akimpongeza kwa namna yake mchezaji wa mchezo wa kuvuta kamba wa timu ya Bunge Sports Club, Mhe. Mussa Sima wakati timu hiyo ilipowasili katika viwanja vya Bunge Jijini Dodoma, Disemba 18, 202, kutoka kwenye michezo ya Mabunge ya Jumuiya ya Afrika Mashariki Jijini Arusha

Wachezaji wa timu ya Bunge Sports Club wakimsikiliza Spika Ndugai akizungumza baada ya kuwasili katika viwanja vya Bunge wakitokea Jijini Arusha katika michezo ya Mabunge ya Jumuiya ya Afrika Mashariki, Disemba 18, 2021

Spika wa Bunge, Mhe. Job Ndugai akipokea kombe la mchezo wa mpira wa miguu kutoka kwa nahodha wa timu ya mpira wa miguu ya Bunge Sports Club, Mhe. Cosato Chumi wakati walipowasili kutoka Jijini Arusha kwenye michezo ya Mabunge ya Jumuiya ya Afrika Mashariki, Disemba 18, 2021, kulia ni Waziri Mkuu, Mhe. Kassim Majaliwa

Spika wa Bunge, Mhe. Job Ndugai akimkabidhi Waziri Mkuu, Mhe. Kassim Majaliwa kombe la mpira wa miguu ikiwa ni moja ya kati ya vikombe saba walivyopata baada ya kuibuka washindi katika michezo ya Mabunge ya Jumuiya ya Afrika Mashariki iliyofanyika Jijini Arusha, Disemba 18, 2021

Spika wa Bunge, Mhe. Job Ndugai akizungumza na wachezaji wa timu ya Bunge Sports Club na watumishi wa ofisi ya Bunge wakati walipowasili kutoka Jijini Arusha kwenye michezo ya Mabunge ya Jumuiya ya Afrika Mashariki, Disemba 18, 2021

Waziri Mkuu, Mhe. Kassim Majaliwa akizungumza na wachezaji wa timu ya Bunge Sports Club na watumishi wa ofisi ya Bunge wakati walipowasili kutoka Jijini Arusha kwenye michezo ya Mabunge ya Jumuiya ya Afrika Mashariki, Disemba 18, 2021

Mafunzo ya Ufugaji Bora na Matibabu, Jiunge sasa kwa KUBOFYA HAPA